नेवा संस्कृतिको गरिमा, सौन्दर्य र पहिचानलाई उजागर गर्ने प्रतिष्ठित प्रतियोगिता मिस नेवा वर्ल्ड ११४६ ज्यापु प्रज्ञा भवनमा भव्य रूपमा सम्पन्न भएको छ। रेक्स इन्टरटेन्मेन्टको आयोजनामा खगेश रञ्जितकारद्वारा आयोजित यस प्रतियोगिताले परम्परा, संस्कृति र पहिचानलाई सम्मान गर्दै युवा महिलाहरूलाई आत्मविश्वास, व्यक्तित्व र नेतृत्व विकासका लागि महत्वपूर्ण मञ्च प्रदान गर्‍यो। कार्यक्रमको समन्वय अप्रवी महार्जनले कुशलतापूर्वक सम्हालेकी थिइन्, जसले सम्पूर्ण कार्यक्रमलाई व्यवस्थित र सुचारु रूपमा अघि बढाउन महत्वपूर्ण भूमिका निर्वाह गरिन्। कार्यक्रमलाई थप आकर्षक बनाउँदै फेसन कोरियोग्राफर तथा मिडिया व्यक्तित्व रोजिन शाक्यले कोरियोग्राफी र सञ्चालनमार्फत स्टेजलाई ऊर्जा र प्रभावशाली प्रस्तुतीकरण प्रदान गरे।

प्रतियोगितामा जियाना महर्जन विजेता घोषित भइन्। उनले आफ्नो आकर्षक व्यक्तित्व, आत्मविश्वासपूर्ण प्रस्तुति र प्रभावशाली स्टेज उपस्थितिमार्फत निर्णायक मण्डल र दर्शक दुवैलाई प्रभावित पारिन्। समग्र उत्कृष्ट प्रदर्शनका कारण उनले मुख्य उपाधिसँगै मिस क्याटवाक, मिस फ्रेन्डसिप, मिस बेस्ट ड्रेस र अर्गनाइजेसन च्वाइस जस्ता विभिन्न विशेष उपाधिहरू समेत जितिन्। प्रतियोगितामा प्रनिस्का तण्डुकार पहिलो रनर–अप घोषित भइन्। उनले बहुआयामिक प्रतिभा प्रस्तुत गर्दै मिस फिटनेस, मिस ट्यालेन्ट र ब्रान्ड एम्बेसडर उपाधि हासिल गरिन्। त्यस्तै प्रतिमा शाक्य दोस्रो रनर–अप बनिन् र उनले आफ्नो अनुशासन र संयमताका लागि मिस डिसिप्लिन उपाधि प्राप्त गरिन्। त्यसैगरी दीपिका महर्जन तेस्रो रनर–अप घोषित भइन्। उनले आफ्नो बौद्धिकता र सामाजिक चेतनाको प्रस्तुति मार्फत मिस स्मार्ट तथा सोसल एम्बेसडर उपाधि जितिन्। प्रतियोगितामा कशिश शाही चौथो रनर–अप बनिन् र उनले आफ्नो तीक्ष्ण व्यक्तित्व तथा आत्मविश्वासपूर्ण उपस्थितिका लागि मिस अक्युट उपाधि प्राप्त गरिन्।

कार्यक्रममा प्रमुख अतिथिका रूपमा मौलापुर नगरपालिकाकी मेयर रीना कुमारी साह उपस्थित रहिन्। उनको उपस्थितिले यस्ता सांस्कृतिक तथा सशक्तिकरणमुखी कार्यक्रमहरूको महत्वलाई अझ उजागर गर्‍यो। विशेष अतिथि निरञ्जन पौडेलले वातावरणीय सचेतनाको सन्देश प्रवाह गरे भने त्रिभुवन शाह र देवेन्द्र ठाकुरको उपस्थितिले कार्यक्रमलाई थप गरिमा र सामाजिक महत्व प्रदान गर्‍यो। निर्णायकहरूमा मिस नेवाः आइकन विजेता
रोजिका बज्राचार्य, व्यक्तित्व विकास प्रशिक्षक प्रभा अमात्य, नृत्य कोरियोग्राफर रोहिया महर्जन, फेसन डिजाइनर श्रेया महर्जन, तथा उत्साह लर्निङ सेन्टरकी अध्यक्ष मन्दिरा राउत रहेका थिए। उनीहरूको विशेषज्ञता र अनुभवले प्रतियोगिताको मूल्यांकन प्रक्रिया निष्पक्ष र व्यापक बनाएको थियो। कार्यक्रमको सबैभन्दा भावुक क्षण तब आयो जब निवर्तमान विजेता लरिशा शाहीले आफ्नो ताज नयाँ विजेता जियाना महार्जनलाई हस्तान्तरण गरिन्। उक्त क्षणले परम्परा, निरन्तरता र नेवा संस्कृतिको गौरवशाली पहिचानलाई प्रतीकात्मक रूपमा झल्कायो।